【李八方online】多人問津 余德寶搞BNO副簽服務

[Trump]

【李八方online】多人問津 余德寶搞BNO副簽服務


北京一意孤行硬推「港版國安法」，第一日就股市大跌，搜尋移民資料嘅人數就急升，好多精明嘅香港人唔係齋搵，係用實際行動表態。油尖旺區議會副主席、公民黨余德寶都收到唔少街坊求助，於是專登整咗個申請BNO嘅副簽熱線，佢同八方講，香港人有咁嘅反應已經說明佢哋係幾咁反對「港版國安法」。

續領番BNO嘅手續，話難唔難、話易唔易。余德寶話通常市民有兩大難題，一個當然係副簽，因為法例規定副簽嘅人要同申請者認識兩年以上、專業人士、兼且已經有BNO，另一難題就係冇咗舊嗰本BNO，佢話若果係唔見咗，就要向英國護照署報失，若果係俾人偷咗，就要報警。

其實反送中以嚟，間唔中都有人搵余德寶副簽，不過佢話自從北京話要立「港版國安法」之後，形勢大為不同，好似尋日佢推出副簽熱線後，一日內就收到起碼60個人聯絡，來自港島區、新界西嘅市民都有，淨係今朝佢都經已幫3位市民副簽，所以佢都諗緊同公民黨反映，不如各區都做。

呢次反應咁熱烈，佢覺得係在在顯示市民唔相信「港版國安法」，更加唔相信立咗法後仲有一國兩制、港人治港，而且好多市民續領番本BNO唔一定係想走，只係想留番條後路。