11月26日，周三。恒生指數升490.85，收13369.45；成交416.78億元。11月期指收13285點，升499點，低水。
www.forum4hk.com
面對信貸危機不斷擴大，根據CNBC統計，政府投入金融系統資金已達4.9284萬億美元，已超過第二次世界大戰美國參軍總費用，唔少人又再擔心通脹令金價上升。
www.forum4hk.com
家吓過量增加嘅貸款（Loans）並非貨幣供應（Money Supply），除非接受貸款嘅銀行倒閉，令呢D貸款變成壞賬（New Debt），聯儲局必須將它貨幣化（Monetize）。理論上唔應該刺激通脹率上升，例如10月份PPI指數回落2.8%（因汽油價格跌24.9%），係1947年以來最大單月跌幅；能源產品價格10月份亦回落12.8%，係1986年以來最大跌幅，甚至食物價格亦回落0.2%；10月份CPI亦回落 1%，係1947年以來最大跌幅，扣除食品及能源嘅核心CPI亦回落0.1%。
www.forum4hk.com
10月份新建房屋下跌38%（較2006年年初最高峰下跌65%），汽車銷量更令人擔心。
www.forum4hk.com
換言之，金價上升係炒錯市；人們將貸款睇成貨幣。
www.forum4hk.com
金價高過800美元勿追
我老曹同意金價最終會上升，但係咪家吓已開始上升？木宰羊。如股市、油價及其他商品價格回落（指依家至明年第二季），金價應再回落到630美元後才上升；金價未見630美元便上升，只因近日各國央行大量供應貨幣，產生Flight to Quality現象，但未反映通縮威力。已低價買金者不妨繼續持有，未買金者千祈咪喺800美元以上追貨。黃金只宜低吸，不應追貨。現階段股市亦只應响大反彈後減持，而毋須低價止蝕；經過十二個月大跌市後，股市正進入低價牛皮，冇永遠下跌嘅股市，亦冇永遠上升嘅金價。
www.forum4hk.com
滬深三百指數微升0.5％，收1834.49。
www.forum4hk.com
豐田汽車債券評級畀譽惠由三個Ａ降至兩個Ａ，係十年內首次，令豐田股價下跌4.2％（今年內已下跌50％）。日圓再上升，至95.02日圓兌1美元，繼續保持強勢。
www.forum4hk.com
必和必拓宣布，放棄談判咗十八個月嘅收購力拓計劃，因為現階段若動用680億美元去收購，所冒嘅風險太大。呢個消息令力拓股價下跌37％及必和必拓升7％。合併未能成功，即全球70％海運鐵礦石出口仍由兩間公司經營，對買家絕對有利（過去六個星期鐵礦石售價下跌50％，反映未來原材料進入供過於求嘅時代）。
www.forum4hk.com
中國鋼鐵廠經過多年繁榮，中國鋼材出口過去以年率60％速度上升，家吓就面對過剩；10月份中國鋼鐵工業已減產17％。印度鋼鐵廠宣布，11月份減價15％至20％；中國入口鋼材產品價格較內地鋼鐵廠生產便宜5%至10％，睇嚟中國鋼鐵材亦有減價空間。中國鋼鐵業聯會宣布，有二十三間鋼鐵廠响9月份蝕本，因為邊際利潤只有1.4％（上半年7.6％）。如無意外全球鋼鐵業將進入低潮。
www.forum4hk.com
商品大王羅傑斯接受彭博電視訪問時表示睇淡美元，呢個似乎已唔係新聞。佢老哥一直睇淡美元（但美元由7月份回升，證明佢錯得好交關）。長遠而言，我老曹亦睇淡，但係咪目前已轉勢？未能肯定。
www.forum4hk.com
2002年10月10日道指見7197.49後，美股牛市開始，2003年3月12日道指見7416.64，確認一浪高於一浪。今年11月21日道指見7449.38係咪牛市開始？响未確定前，只可以估估吓；我地只能做事後孔明，無法做事前先知。
www.forum4hk.com
股市進入沮喪期
畢巴頓認為，We are in for the mother of all bear market rallies。响我地陷入徹底失望前，或者可參考一下附圖。所有熊市都喺投資者絕對失望嘅環境下結束。過去投資者情緒好難量度，自從有咗VIX指數，呢個已唔再係問題。投資者情緒【圖】改變可用VIX指數反映，上周四係近期少見嘅恐懼高峰期。市場逐漸進入沮喪（Despondency）期，即使唔係見底，相信離底不遠。呢個係循環理論（Cycle），係好少人學習嘅有用理論。我老曹唔敢肯定10月27日恒指10676點係咪見底，因為未出現一浪高於一浪嘅走勢，但相信離底不遠。股市走响經濟前三到九個月，即經濟見底時，股市早已上升三到九個月，因此不能用經濟去預測股市，只可用股市去預測經濟。如經濟响明年6月見底，股市有條件响今年10月27日見底。好似聰明嘅女士應該站喺自己男人背後。有魅力嘅男性係唔會忘記畀太太一個hug；呢個聖誕節請畀太太一個熱烈嘅擁抱，呢樣嘢更勝千言萬語。呢個社會仍係男女有別，當男性面對壓力，作為妻子必須加倍安慰及細心，唔係就唔配做賢妻良母；反之，妻子面對壓力，做丈夫嘅可能只替佢按摩肩膊或叫佢去睇心理醫生；更多丈夫可能索性唔理，因為中國人社會並冇要求男士做賢夫良父，能為太太按摩肩膊嘅男士已被列為好丈夫。
www.forum4hk.com
根據周一附圖，1929至32年嘅超級大熊市，當股市跌幅超過50％後，亦畀你一個熱烈嘅擁抱（反彈40％後才再回落）。現水平股價肯定已超過棄股投降（Capitulation），係咪進入沮喪期仍未清楚。根據Morningstar數據，9月份有560億美元由美國互惠基金淨流出，10月上升到 707億美元。Morningstar研究所得，投資者最喜歡高價買入、低價賣出。冇人知道11月21日係咪道指最低，但肯定離底不遠。
www.forum4hk.com
以價值角度睇，股票到咗好便宜嘅水平（當然仍可進入偏底局面）。唔似十二個月前過分偏高，即係話長期而言，响恒指10676點入貨有得守，最多只係吃眼前虧。1932年7月19日道指亦只低於200天線34.5％，今年11月21日道指7449點亦拋離200天線約34.5％。換言之，美股甚至未見底亦已進入超賣。响熊市中，反彈20％至40％並唔係冇可能，值博率漸上升。三十年代美國既無福利制度，貨幣政策亦出錯；加上銀行關門才引發大蕭條。類似情況唔可能响家吓嘅美國重演。
www.forum4hk.com
中國人行決定下調存貸款基準利率1.08厘，亦下調存款準備金率。
www.forum4hk.com
古語有云：「行百里者半九十」，意思係行一百里路，雖然已走完其中九十里，但亦只當作完成一半。
www.forum4hk.com
工業革命最先响英國發生，令英國由農業社會走向工業社會，最後走上大量消費社會，共用咗二百五十年；美國由農業社會走向工業社會，最後走上大量消費社會，共用咗一百多年；日本則前後共用咗六十年；中國由1978年改革開放開始，由農業走向工業已三十年，能否响今年進入大量消費社會（即較日本又快一倍）？
www.forum4hk.com
中國改革開放由四個特區開始，即深圳、珠海、汕頭及廈門。當年底子最差係深圳，只係一個小漁村，人口亦唔多。1980年前深圳只有三萬多人口，兩三條小街，係極之貧窮及落後嘅邊陲小鎮；二十八年後嘅今天，人口超過一千萬人，人均GDP 1萬美元。1980至2007年深圳GDP以年率26.9％速度上升，去年GDP達6801億元人民幣，列全國大中城市第四位；地方財政收入658億元人民幣，列全國第三；人均收入全國第一。
www.forum4hk.com
欠缺闖將難成事
家吓正由製造業走向高新技術產業、金融業、物流業及文化產業，四大產業支柱開始低能耗、高產出及高效益嘅經濟增長之路。最終深圳係咪成為另一個香港？則木宰羊，呢個由深圳能否轉型成功去決定。深圳成功因地利之便。由於緊靠香港，令香港逐漸缺乏競爭力嘅工業，响1980年起大量內移，造就咗深圳特區今天嘅成就；珠海雖鄰近澳門，但澳門工業唔多，能搬上珠海者更少；至於汕頭同廈門卻因台灣政府响八十年代嚴禁三通，而發展唔起。深圳成功經驗响1989年六四事件後，擴散到全國各地，尤其係長三角一帶。有人話呢個係第二次改革開放。深圳過去嘅成功，帶來今天嘅麻煩。1980年後香港（由1949年開始經過三十年發展，香港土地成本逐漸昂貴及工資上升，令本港工業停滯不前）嘅幸運係巧遇中國改革開放政策，令香港工廠內移後愈做愈大，香港順利進入大量消費社會。今年後，深圳能否好似過去三十年前香港咁，由工業社會順利走向大量消費？上兩次改革開放，深圳都有一位政治領袖，即係鄧小平為佢開路。1980年深圳成為特區係鄧小平指定；1989年六四事件後佢嘅南巡講話：「誰不支持改革開放，誰就要下台。」變成全國學深圳；加上當年中國官員剛進入新舊交替期，新中國成立後出生一代，响九十年代剛四十歲左右，舊中國成長一代卻步入六十歲。新一代領導人不但係少壯派，而且冇既得利益（八十年代中國仍相當窮），所以皆支持鄧小平嘅改革開放改革，並且一湧而上。
www.forum4hk.com
家吓中國製造業正面對八十年代香港相同問題。係咪亦進入大量消費期？今天中國已冇等同鄧小平咁有威嚴嘅領導人；依家中國領導人做任何事前，必須响黨內取得共識。唔似鄧小平擁有超凡魅力兼無人敢搞對抗。八十年代嘅闖將今天亦接近退休年紀，並响1990至2008年成為社會上既得利益階層，已唔係1989年前咁一無所有。改革開放後出生嘅新一代，雖然受教育好D，但勇氣已唔及八十年代嘅闖將；家庭環境好者，唔少留學外國，有D索性唔回國；回國者亦成為海歸派，成為既得利益階層一分子，未必支持第三次改革開放。依家中國嘅問題已唔係一無所有，而係貧富差距愈拉愈大，以及城鄉收入差距擴闊。政府唔少部門更與特殊利益集團關係愈來愈好，成為利益共享；例如建設部與地產商；工業部與廠商。建設部反而阻礙中央房屋政策落實，以免傷害本地地產商利益；工業部甚至保護廠商，同環保部搞對抗；甚至農業部亦反對進口農產品去保護農民。有時唔係貪污問題，而係利益共享，第三次改革開放推行既冇強而有力嘅領導人，亦缺乏闖將。
www.forum4hk.com
中國嘅改革開放政策唔似1800年嘅美國咁，由國會制定法律，各州嚴格執行；更加唔似日本嘅明治維新，由七百多名留學各國嘅官員回國後，响明治天皇強力支持下，執行日本現代化政策。1978年嘅改革開放政策源自十年文革後嘅國家一窮二白，連食飯都有問題，先決定摸着石頭過河（試吓）。一試之下，四大特區以深圳最成功，1989年六四事件後便擴展至全國，並唔係乜嘢深思熟慮嘅決定。今年中國面對西方國家經濟陷入衰退，令中國出口增長率急跌，中國唔可以將 1980至97年香港嘅經濟模式照搬，甚至南韓、台灣及日本模式亦唔可以照搬。呢次真係摸着石頭過河，而冇樣辦可學；如照搬英國或美國模式而令共產黨有一天下台點算？唔似國民黨喺台灣下台後八年仍可再上台，共產黨一旦下台，情況肯定較2000年台灣國民黨下台更狼狽。
www.forum4hk.com
從世界各國過去嘅例子睇，由農業社會走上工業社會，政治上仍獨裁嘅影響唔大。不過，由工業社會走上大量消費社會，背後必須有一個開明政府。中國過去三十年策略係政治上保守，經濟上採改革開放政策，日後必須改變；中國必須有一個開放型嘅政府才能有一個開放型嘅社會，才會走上大量消費社會之路。即第三次改革開放不但較上兩次難，同時擔心出現行百里者半九十現象。中國响改革開放之路上雖然已完成九十里路，但最後十里如果唔走落去，咁中國嘅改革開放政策就等同只行咗一半，情況好似東南亞國家或拉丁美洲。
www.forum4hk.com
內地二手房市場發展唔起嘅理由係房地產開發企業所繳納嘅稅費達六十項。除去地價，僅稅費已佔商品房銷售額27％；加上中國四大銀行都唔會為樓齡超過十五年嘅商品房提供按揭，從而把大量舊房擋在二手房市場之外；再加上七十年所有權限制，令二手房市場發展唔起。
www.forum4hk.com
內地貧富差距拉大來自產業分化。1980年高工貿階層平均工資係低工資層一點三一倍，2006年已拉大到三點四五倍。產業分化不但導致貧富差距拉大，亦將樓市推向兩極化。廣州市民自有住房擁有率高達80％超過好多西方發達國家，去年一手房與二手房交易量持平（美國係二比八）。廣州人以買新樓為榮，以買二手樓為恥。以住新屋成為個人成功嘅象徵，二手屋就乏人問津。其次廣州人購買新樓係由八十平方米搬到一百二十平方米甚至一百五十平方米；再加上只有七十年住房所有權，超過呢個年限便收歸國有，形成銀行唔敢提供按揭。樓齡愈長，人們愈唔敢買，亦因此唔願意整修舊樓，導致舊樓迅速老化，結果令廣州樓市兩極化（舊樓便宣，新樓昂貴），全國現象都係咁。
www.forum4hk.com
